рубрика: вести
23.05.2013
Продолжи политички мотивираниот судски прогон против Архиепископот Јован
На 23 Мај 2013 год., се одржа уште едно рочиште од политички мотивираниот судски процес против Архиепископот охридски г.г. Јован и останати Епископи, монаштво и верници на Православната Охридска Архиепископија.
Главен сведок на ова рочиште беше претставникот на расколничката МПЦ, Димитар Белчовски, којшто изложувајќи невистини, тенденциозно сведочеше со предопределена цел само за да им наштети на неправедно обвинетите Архиереји, монаштво и верници на сеправославно признатата Црква во Р. Македонија.
Ова рочиште, како пратеник на Светиот Архиерејски Собор на Српската Православна Црква, којшто е во тек, го следеше Неговото Преосвештенство Епископот захумско-херцеговачки и приморски г. Григориј.
рубрика: вести
22.05.2013
Извештај на американскиот Стејт Департмент за верските слободи во Р. Македонија
Американскиот Стејт Департмент го објави својот редовен годишен извештај за верските слободи во Р. Македонија.
Како по обичај, голем дел од домашните журналисти, коишто Фридом Хаус ги именува: „политички назначеници“, фингирајќи атмосфера на целосно отсуство на прекршување на верските слободи, го пренесуваат само оној дел од извештајот, во кој се вели: „верските слободи во Р. Македонија генерално се почитуваат“!
Во продолжение, укажуваме на некои делови од извештајот кои домашната јавност немаше прилика да ги сознае од македонските средства за информирање.
Стејт Департментот во својот најнов извештај, покрај другото предочува и дека припадници на различни верски групи тврдат дека владата ја фаворизира МПЦ со тоа што бесплатно ѝ отстапува јавни простори, ја финансира изградбата на нови храмови, и уште повеќе, ја обвинуваат доминантната македонска партија во владеачката коалиција дека ги политизира верските прашања за сопствена политичка добивка, потоа дека настојува да ги привлече верските чувства и чувството за идентитетот на мнозинското население, а како средство за да ја постигне таа цел - ја употребува МПЦ.
Во извештајот на Стејт Департментот, обрнато е должно внимание и на прогонот канонската православна Црква во Р. Македонија, на Православната Охридска Архиепископија. Извештајот посочува дека припадниците на Православната Охридска Архиепископија, којашто Српската Православна Црква ја признава како единствена легитимна Православна Црква во Р. Македонија (а, тоа значи дека и сите помесни православни цркви, ја сметаат Православната Охридска Архиепископија како дел од Соборната Православна Црква), се жалеа на медиумско малтретирање, токму заради нивните верски убедувања.
Извештајот го нотира и најновиот политички мотивиран судски прогон, којшто се прошири на повеќемина Епископи, монаштво и верници на Православната Охридска Архиепископија, истакнувајќи дека - Министерството за правда во Мај 2012 год., обвини повеќе нејзини членови за „перење на пари“, после што и Архиепископот охридски Јован беше префрлен во притворско одделение на затворот Шуто Оризари. Извештајот вели дека припадниците на Православната Охридска Архиепископија посочуваат дека затворските услови се неприфатливи. Истото тоа го тврди и Стејт Департментот во неговиот последен извештај за човекови права (http://poa-info.org/vesti/2013/04/20130422.html).
На крајот, Стејт Департментот констатира дека Православната Охридска Архиепископија не ја признава самопрогласената автокефалија на МПЦ.
Потсетуваме дека повеќе од четириесет години, ниту една друга помесна православна црква не ја признава самопрогласената автокефалија на МПЦ од времето на комунизмот (1967 год.), та затоа во светот на Православието, на МПЦ се гледа како на расколничка верска организација!
Целосниот извештај се наоѓа на следниов линк: http://www.state.gov/j/drl/rls/irf/religiousfreedom/index.htm?year=2012&dlid=208340
рубрика: вести
22.05.2013
Епископот бачки г. Иринеј за прогонот на Архиепископот охридски г. г. Јован и Православната Охридска Архиепископија
На почетокот од работата на Светиот Архијерејски Собор на Српската Православна Црква, Неговото Преосвештенство Епископот бачки г. Иринеј даде изјава во однос на прогонот на Неговото Блаженство Архиепископот охридски г.г. Јован и Православната Охридска Архиепископија.
рубрика: вести
21.05.2013
Започна Светиот Архиерејски Собор на Српската Православна Црква
Со света Архиерејска Литургија, на којашто началствуваше Неговата Светост Патријархот српски г.г. Иринеј, во сослужение на поголем број Архиереји, во Белград, започна Светиот Архиерејски Собор на Српската Православна Црква.
Како и секоја година, на крајот од својата работа, Светиот Архиерејски Собор ќе објави соопштение за јавноста.
15.05.2013
За неуспехот на проектот: МПЦ во раскол!
Еве, поминаа неколку денови од третиот меѓурелигиски собир, којшто имаше намера да ги третира слободата и достоинството во меѓучовечките односи! Несомнено, убаво е тоа што се трудат. Впечатоците, пак, веќе се собираат, та исказот со којшто ќе го определам посочениот собир, после неговото испраќање, е едноставен: нашминкана смрт!
Избезумени од лицето на умирањето, западните општества стопанисуваат со агенции за шминкање на смртта! На луѓето им е полесно да го испратат разубавениот, бојосаниот мртовецот, доколку не ѝ погледнат на смртта во очи.
На нашето општество му е поподносливо со бојосани собири да ги спушти верските слободи во гробот, отколку да ѝ погледне на реалноста во лице.
При нивниот наведнат поглед, за каква слобода и достоинство може да стане збор, кога зависните журналисти единаесет години наназад ритуално го извикуваат тоа што ќе им го шепнат структурите: проектот ПОА пропадна, пропадна, пропадна..., небаре горат од желба да закопуваат живи луѓе!
При недостаток на футур во нивните животи, не можат да видат дека првите, вторите, третите собири, и нека избројат уште колку сакаат следни, во суштина ништо и не менуваат. Лицето на смртта си останува подеднакво страшно, доколку човекот не се преобрази себе си, и тоа од внатре!
Следствено, со подадена рака, го предлагам за расудување следново: проектот расколничка МПЦ е гнил, не го бива; ќе претнат по нешто, но само „за по куќу“, ако тоа им го организира власта, и толку; но, внимавајте - цели четириесет и кусур години не им успева да тргнат напред, да излезат од демократскиот мрак, та да вкусат и видат што значи да се биде призната, канонска, соборна Црква!
јероѓакон Висарион (Давчев)
рубрика: вести
14.05.2013
Одбиено барањето на потпретседателот на Меѓурелигиското собрание во БиХ, муфтијата сараевски Хусеин еф. Смајиќ за посета на Архиепископот Јован
На 09 Мај, оваа година, во име на Меѓурелигиското собрание во Босна и Херцеговина, муфтијата сараевски мр. Хусејин еф. Смајиќ, испрати официјално писмо до Министерот за правда на Р. Македонија г. Блерим Беџети со коешто бара во име на Меѓурелигиското собрание во БиХ, Претседателот на собранието, Епископот захумско-херцеговачки и приморски г. Григориј да го посети Неговото Блаженство Архиепископот охридски и Митрополит скопски г.г. Јован, во затворот во Шуто Оризари.
Меѓурелигиското собрание во Босна и Херцеговина е основано во 1997 год. со цел градење на граѓанско општество со помош на меѓурелигиска соработка.
Ова барање, коешто е согласно на етиката, и на Христијанството, и на Исламот, да се посети оној којшто страда во затворот, коешто е согласно, воопшто, на човечката етика, беше одбиено од страна на домашните власти!
Со ваквиот суров однос кон Архиепископот охридски г.г. Јован, којшто веќе една година и шест месеци се наоѓа во затвор, дури и без основна здравствена заштита, се потврдуваат сомнежите дека врз него се спроведува тортура со цел негово уништување!
рубрика: вести
12.05.2013
Фридом Хаус: Р. Македонија и натаму назадува
Во најновиот извештај на Фридом Хаус, за слободата на медиумите, Р. Македонија, по минатогодишниот драстичен пад од 19 места, и понатаму назадува и бележи пад од дополнителни 5 места на ранг листата, што уште повеќе ја оддалечува од сите други земји во регионот, вклучително и од Косово, Албанија и Босна, со кои до скоро беше на исто место, а сега се наоѓа 24 места подолу.
Во своите извештаи, како најголеми проблеми, Фридом Хаус ги наведува, по следниот редослед: корупцијата на судството, неслободата на медиумите и немањето верски слободи.
Во делот за верски слободи во сите извештаи, без исклучок, се споменува проблемот на, како што се наведува, одметнатата МПЦ, со канонски признаената Православна Охридска Архиепископија.
Како и во останатите извештаи од меѓународната заедница за состојбата со слободите и човековите права во Р. Македонија, карактеристично е што Уставот и законите ги гарантираат слободите, но во пракса тоа не се почитува. Сето ова недвосмислено упатува на верскиот прогон врз Православната Охридска Архиепископија којшто се врши токму преку прекршувањето на загарантираните права и слободи на граѓаните припадници на Православната Охридска Архиепископија.
рубрика: вести
08.05.2013
Епископот брегалнички г. Марко го прослави својот именден
Неговото Преосвештенство Епископот брегалнички и Местобљустител битолски г. Марко, на 08-ми Мај, со црковно благолепие, го прослави својот именден, споменот на светиот Апостол и Евангелист Марко.
Во параклисот „Свети Николај Мирликијски“, во Штип, беше отслужена света Архиерејска Литургија на која началствуваше Неговото Преосвештенство Епископот брегалнички и Местобљустител битолски г. Марко. На Литургијата сослужуваше Неговото Преосвештенство Епископот стобиски и Местобљустител струмички г. Давид, како и свештенослужители од Охридската Архиепископија, и од Жичката Епископија на Српската Православна Црква. После прочитаното Евангелие беседеше Епископот стобиски г. Давид, којшто воедно и му го честиташе именденот на Епископот брегалнички г. Марко. На крајот од Литургијата, со свое слово отпоздрави Епископот брегалнички г. Марко.
После Литургијата, за верниците од Брегалничката, и од другите Епископии на Охридската Архиепископија, кои со своето присуство ја зголемија радоста на прославата на светиот Апостол и Евангелист Марко, Епископот г. Марко приреди трпеза.
рубрика: вести
22.04.2013
Прогонот врз верска основа во Р. Македонија – продолжува!
Американскиот Стејт Департмент го објави својот редовен извештај за состојбата со почитувањето на човековите слободи во Р. Македонија.
Најголем акцент е ставен на неуспехот на властите да го почитуваат владеењето на правото, што првенствено се огледува во мешањето во судството и медиумите, во селективниот судски прогон на политичките неистомисленици на владата, како и во значителното ниво на корупција во владата. Во извештајот е нагласено дека полицијата се наоѓа над законите, а политичкото мешање во судството, судската пристрасност, неефикасноста и корупцијата го забавуваат владеењето на правото.
Како еден од најгорливите проблеми, извештајот не пропушта да го спомне и малтретирањето на притворениците и затворениците од страна на полицијата и затворските чувари, лошите услови и преголемиот број на затвореници во државните затвори, како и доцнењето во овозможувањето на правни советници на притворените и кривично гонетите. Извештајот јасно кажува дека затворските установи не ги исполнуваат меѓународните стандарди, се во руинирана состојба, а затворениците се сместени – како што се наведува – во мизерни, нехигиенски и опасни услови, а некои се заклучени во келија по 23 часа на ден.
Извештајот на Стејт Департментот го цитира и извештајот на Комитетот за заштита од тортура на Советот на Европа, којшто остро го критикува третманот на затворениците и бара тие да не бидат сместени во услови еднакви на самица.
Потсетуваме дека Неговото Блаженство Архиепископот охридски и Митрополит скопски г.г. Јован, со сериозни здравствени проблеми, веќе една година и пет месеци се наоѓа токму во такви притворски услови (23 часа заклучен во келија), за коишто Советот на Европа утврдува дека се „еднакви на самица“!
Извештајот на Стејт Департментот понатаму нагласува дека законските регулативи забрануваат произволно апсење и притворање, но тоа не се почитува, па произволното апсење и притворање и понатаму остануваат отворен проблем. Извештајот наведува дека иако Уставот и законите гарантираат независно судство, сепак владата врши политички притисок и заплашување врз судството. Архиепископот охридски Јован во последниве десет години, од страна на споменатите судови бива затворен шест пати, против него се водат низа политички монтирани судски процеси, а минатата година спектакуларно беа апсени и со лисици приведени голем број монаштво и верници на Архиепископијата. Исто така, со монтирани судски процеси, во 2012 г., на која и се однесува Извештајот на Стејт Департментот, беше проширен државниот прогон врз верска основа и против останати Епископи, свештеници, монаштво и верници на Православната Охридска Архиепископија.
Во врска со слободата на говорот, Стејт Департментот повторно нотира дека иако Уставот и законите гарантираат слобода на говорот и печатот, властите се тие коишто во пракса не секогаш покажуваат почитување на ова право, а владиниот притисок врз медиумите продолжува да биде проблем!
Последиците од непочитувањето на човековите права коишто се загарантирани со Уставот и законите на Р. Македонија, Православната Охридска Архиепископија и нејзиниот Претстоител, Архиепископот охридски Јован, ги поднесуваат повеќе од една деценија. Повеќе од една деценија, во однос на Православната Охридска Архиепископија, преку еднострано информирање, со многу ретки исклучоци, се спроведува систематска кампања на говор на омраза.
Тортурата врз верска основа кон припадниците на Православната Охридска Архиепископија, преку постојаните политички мотивирани затвори за Архиепископот охридски Јован, преку судски процеси кон речиси сите Епископи, кон монаштво и верници на Православната Охридска Архиепископија, како и преку бесправното одбивање на нејзината регистрација во македонското судство – продолжува!
Извештајот во целост е достапен на следнава адреса: http://www.state.gov/documents/organization/204523.pdf
Во прилог на информацијата потсетуваме и на следниов видео материјал:
