03.12.2013

Новото лицемерие на журналистот на „Дневник“ Бранко Ѓорѓевски

Во дневниот весник „Дневник“, на 01 Декември 2013 год., објавено е интервју со расчинетиот епископ рашко-призренски г. Артемиј. Разговорот го водел Бранко Ѓорѓевски.

Ништо немаше да ја предизвика нашата реакција доколку ова интервју не е ново лицемерие на гореспомнатиот журналист. Имено, на територијата на Р. Македонија постои Црква, која е призната од сите помесни православни Цркви, а тоа е автономната Охридска Архиепископија и веќе полни единаесет години таа служи во катакомби, а Бранко Ѓорѓевски ниту еднаш не напишал во какви услови на државен прогон се богослужи во Православната Охридска Архиепископија.

Веќе единаесет години припадниците на Православната Охридска Архиепископија се гонети на верска основа! Нивниот Претстојател, Блаженејшиот Архиепископ охридски г.г. Јован, во последниве единаесет години по седми пат е во затвор, а Бранко Ѓорѓевски пишува за судските процеси на Артемиј. На страна тоа што никогаш, во цели единаесет години, журналистот Бранко Ѓорѓевски не побарал интервју од Архиепископот охридски г.г. Јован, за толку битни случувања со Црквата во нашата татковина, туку сите овие единаесет години тој искривено, злонамерно, тенденциозно и непрофесионално известува за случувањата во и околу Православната Охридска Архиепископија, а особено за нејзиниот Првојерарх, Архиепископот охридски и Митрополит скопски г.г. Јован. Е, како може тоа поинаку да се нарече, ако не лицемерие? Лицемерие, исто или слично на она што го има расколничката МПЦ, кога вели дека ќе се грижела за затворениците, бидејќи тоа и било евангелска обврска; а, токму таа, односно по нејзина тужба, Архиепископот охридски г.г. Јован е веќе седми пат во затвор! И неговото затворање ли претставува нејзина евангелска обврска?!

Што да додадеме друго, освен смирено да им предочиме: мачете уште повеќе, лицемерете до бескрај, така уште појасно ќе се гледа вашата нечовечност, а од друга страна уште повеќе ќе блеска смирението на затворениот за единството на Црквата Архиепископ охридски г.г. Јован и на прогонетата Православна Охридска Архиепископија!

Свесни сме дека оваа реакција „Дневник“ нема да ја објави, но благодарни сме на Бога затоа што живееме во ерата на комуникации, па сите оние што треба да разберат за лицемерието на Бранко Ѓорѓевски, бездруго ќе разберат и без тоа „Дневник“ да го објави!

Од Канцеларијата на Архиепископијата охридска и Митрополија скопска